Felles policy for offentleggjering i HMS-etatane
Samarbeidet mellom HMS-etatane, som går heilt tilbake til tidleg på 1990-talet, har som hovudformål å sikre ein så einskapleg tilsynspraksis som råd er. Leiarane for tilsynsetatane knytte til HMS-samarbeidet møtest regelmessig for å diskutere område av felles interesse, og det er etablert samarbeidsgrupper som arbeider med koordinering innan tilsyn, opplæring, regelverk og informasjon. Direktørane i etatane har faste møte to gonger i året, og ein felles policy for offentleggjering av tilsynsresultat har vore tema på fleire møte. På møtet i oktober 2009 slutta Direktørgruppen for HMS-etatene seg til policyen og til at han blir teken inn i styringsdokument.
Ofentleggjering av tilsynsresultata til DSB
Tilsynsstrategien for 2008–2012 legg føringar for tilsynsaktivitetane våre. For å få meir merksemd rundt førebyggjande tryggleiksarbeid og beredskap i samfunnet generelt og hos tilsynsobjekta spesielt har DSB eit ønske om at funn og resultat i aukande grad skal offentleggjerast. Det blir lagt vekt på at resultat og funn skal offentleggjerast så snart som mogleg etter at tilsyna er haldne. DSB offentleggjer i hovudsak tilsynsresultata sine på www.dsb.no. I nokre tilfelle blir også eigne publikasjonar tekne i bruk for å informere om funn etter tilsyn. Her er nokre eksempel frå 2009:
Skogbrannberedskap
I 2009 undersøkte DSB skogbrannberedskapen i 100 av brannstella i landet. Undersøkinga viste at mange brannstell var utan dokumentert skogbrannberedskap. Halvparten mangla tilfredsstillande dokumentasjon av skogbrannberedskapen. Kommunane det gjaldt, fekk beskjed om å utarbeide skriftlege planar for handtering av skogbrannar.
600 ulovlege lighterar fjerna frå marknaden
I løpet av dei to siste åra har europeiske myndigheiter for marknadskontroll fjerna meir enn 600 lighterar frå marknaden. Dette er lighterar som ikkje er barnesikre, eller som kan forvekslast med andre typar produkt som appellerer til barn.
Styrkt tilsyn med nye elektriske anlegg
I 2010 skal Det lokale elektrisitetstilsyn (DLE) prioritere tilsyn med nye elektriske anlegg i bustader. Tilsynsrapportar og innspel til DSB indikerer at det er feil ved opptil 60 prosent av kontrollerte nye elektriske anlegg i bustader her i landet. Dette er ei omlegging til eit meir risikobasert tilsyn, det vil seie tilsyn på områda der det er størst fare for at det kan vere feil.
Leiker heldt ikkje mål i test
DSB testa 25 leiker. Det blei nedlagt omsetningsforbod for tolv av dei da de ikkje oppfylte krava til tryggleik. For resten av leikene blei ein testrapport og ein instruks om nødvendig merking av leikene sende til dei aktuelle importørane. Informasjon om farlege produkt blir lagd ut i EUs informasjonssystem om farlege forbrukarprodukt (RAPEX). DSB er kontaktmyndigheit for RAPEX2 i Noreg.
Storkontroll av farleg gods
I slutten av oktober blei det gjennomført ein storkontroll av farleg gods i Oslo hamn (biletet under). Kontrollen var eit samarbeid mellom DSB, Sjøfartsdirektoratet, Kystverket, Statens vegvesen, politiet, Luftfartstilsynet og tollvesenet. Formålet var å kontrollere at containerar som transporterer farleg gods, er i god stand og korrekt merkte. Det blei også teke stikkprøvar av containerar som ikkje var merkte med farleg gods, og kontroll av farleg gods på tankbilar og andre tunge køyretøy i området. Kontrollen avdekte at kvar femte container var feilmerkt. Feil eller mangelfull merking av farleg gods kan få alvorlege konsekvensar ved uhell.
Samorda tilsynsaksjon hos verksemder på HMS-området
I aksjonen deltok SFT, DSB, Arbeidstilsynet, Statens strålevern og NSO. I tillegg deltok tilsynspersonell frå Fylkesmannen, brannstellet og lokale elektrisitetstilsyn. Målet med tilsynsaksjonen var å auke medvitet og kompetansen om risikoførebyggjande arbeid og dermed auke tryggleiken. Rundt 900 verksemder fekk tilsyn, og resultata viste at 334 av dei 561
små og mellomstore verksemdene som fekk besøk, ikkje hadde kartlagt farar og potensielle problem godt nok. Aksjonen viste at jo større verksemdene er, desto betre er dei til å gjere ei risikovurdering av verksemda si.
Departementstilsyn
DSB hjelper Justis- og politidepartementet (JD) med systemretta tilsyn med det sivile beredskapsarbeidet i departementa i tråd med kongeleg resolusjon av 3. november 2000. Tilsynsrapportane blir sende til JD og er unnateke frå offentlegheit med heimel i § 15 i offentleglova, om dokument frå underliggjande organ.